លោក ដូណាល់ ត្រាំ បានបញ្ជាក់ថា កម្ពុជានិងថៃចង់បានបទឈប់បាញ់ និងសន្ដិភាពដូចគ្នា ហើយបន្ទាប់ពីបាននិយាយជាមួយមេដឹកនាំប្រទេសទាំងពីរ វិបុលភាព សន្ដិភាព និងឈប់បាញ់គ្នា នឹងអាចលេចរូបរាងឡើងឆាប់ៗនេះ។ លោក ត្រាំ បានបន្ថែមថា លោកបានព្យាយាមសម្របសម្រួលស្ថានភាពដ៏ស្មុគស្មាញមួយ ដែលមនុស្សជាច្រើននាក់បានស្លាប់នៅក្នុងសង្គ្រាម។
កម្ពុជាបានស្នើឱ្យសហគមន៍អន្តរជាតិថ្កោលទោសលើប្រទេសថៃ ដែលបានប្រើប្រាស់កងទ័ពនិងអាវុធធន់ធ្ងរបាញ់ផ្លោង រួមទាំងប្រើយន្តហោះចម្បាំង F-16 ទម្លាក់គ្រាប់បែកឈ្លានពានទាំងកម្រោលចូលក្នុងទឹកដីកម្ពុជា ក្នុងនោះកងទ័ពថៃក៏បានសារភាពថា បានប្រើប្រាស់គ្រាប់បែកចង្កោមវាយប្រហារលើកម្ពុជា ដែលជាទង្វើរំលោភច្បាប់អន្តរជាតិ។
អ្នកនាំពាក្យក្រសួងការពារជាតិកម្ពុជាបានលើកឡើងនៅព្រឹកថ្ងៃទី២៦ ខែកក្កដាថា ទាហានថៃបានពង្រីកការវាយប្រហារឈ្លានពានកម្ពុជា ដល់ខេត្តពោធិ៍សាត់ បន្ទាប់ពីបានចូលវាយប្រហារតាមព្រំដែននៅខេត្តឧត្តរមានជ័យ និងព្រះវិហារ តាំងពីព្រឹកថ្ងៃទី២៤ ខែកក្កដា និងការដាក់ពង្រាយកម្លាំងទ័ពត្រៀមវាយប្រហារចូលខេត្តកោះកុងបន្ថែមទៀត។
អ្នកនាំពាក្យក្រសួងការពារជាតិកម្ពុជាបានអះអាងថា ក្នុងរយៈពេលពីរថ្ងៃនៃការវាយប្រហាររបស់កងទ័ពថៃ បានសម្លាប់ជនស៊ីវិលខ្មែរ ៨នាក់ស្លាប់ របួស៥០នាក់ និងទាហានស្លាប់៥នាក់ របួស២១នាក់។
ប្រធានាធិបតីសហរដ្ឋអាមេរិកបានដាក់លក្ខខណ្ឌថា ប្រទេសកម្ពុជានិងថៃ នឹងមិនអាចទទួលបានការចុះកិច្ចព្រមព្រៀងពាណិជ្ជកម្មថ្មីនោះទេ ប្រសិនមិនព្រមបញ្ឈប់ការប្រយុទ្ធគ្នា។ សហរដ្ឋអាមេរិកបានសម្រេចដំឡើងពន្ធ៣៦%ដូចគ្នា លើប្រទេសកម្ពុជានិងថៃ ខណៈប្រទេសទាំងពីរកំពុងព្យាយាមចរចាសុំឱ្យសហរដ្ឋអាមេរិកចុះអត្រាពន្ធបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។