ក្រសួងការបរទេសកោះតៃវ៉ាន់ ខកចិត្ត និងប្រកាសប្រឆាំងយ៉ាងដាច់អហង្ការចំពោះសកម្មភាពរបស់រដ្ឋាភិបាលកម្ពុជា ដែលបានបញ្ជូនជនជាតិតៃវ៉ាន់ ទៅចិនដីគោក។ ក្រសួងការបរទេសតៃវ៉ាន់លើកឡើងកាលពីថ្ងៃទី១៤ មេសា ថា បន្ទាប់ពីទទួលបានដំណឹងការចាប់ខ្លួនជនជាតិតៃវ៉ាន់ ការិយាល័យតំណាងរដ្ឋាភិបាលតៃវ៉ាន់នៅក្នុងទីក្រុង ហូជីមិញ ប្រទេសវៀតណាម បានចរចាជាមូយអាជ្ញាធរកម្ពុជា ស្នើសុំបញ្ជីឈ្មោះ និងស្នើសុំបញ្ជូនជនជាតិតៃវ៉ាន់ទាំងនោះ ទៅប្រឈមមុខផ្លូវច្បាប់នៅកោះតៃវ៉ាន់។
ក្រសួងការបរទេសកោះតៃវ៉ាន់ បន្តថា អាជ្ញាធរអាជ្ញាធរកម្ពុជាមិនបានឆ្លើយតបតាមការស្នើសុំខ្លួនទេ ថែមទាំងបានបញ្ជូនក្រុមជនសង្ស័យជនជាតិតៃវ៉ាន់ រួមទាំងជនជាតិចិនដីគោកជិត២០០នាក់ ទាំងបង្ខំទៅឱ្យអាជ្ញាធរចិនដីគោក កាលពីយប់ថ្ងៃអាទិត្យ និងព្រឹកថ្ងៃចន្ទ។ ក្រសួងការបរទេស តៃវ៉ាន់ចោទប្រកាន់ថា ការសម្រេចចិត្តរបស់កម្ពុជាគឺស្ថិតក្រោមសម្ពាធពីរដ្ឋាភិបាលចិនកុម្មុយនិស្ត។
ឆ្លើយតបការចោទប្រកាន់នេះ ក្រសួងការបរទេសកម្ពុជា កាលពីថ្ងៃទី១៥ ខែមេសា បានចេញសេចក្ដីបំភ្លឺថា ជនជាតិតៃវ៉ាន់ទាំងនោះ ជាឧក្រិដ្ឋជន មិនមែនជនស្លូតត្រង់ឡើយ ហើយការចាប់បញ្ជូនពួកគេទៅចិនដីគោក ជាការអនុវត្តច្បាប់របស់កម្ពុជា ស្របតាមកិច្ចព្រមព្រៀងទ្វេភាគីជាមួយរដ្ឋាភិបាលចិនដីគោក។ ក្រសួងការបរទេសបន្ថែមថា កម្ពុជាក៏មិនបានធ្វើខុសពីការអនុវត្តដូចទៅនឹងការសម្រេចចិត្តរបស់បណ្ដាប្រទេសមួយចំនួនទៀត ដែលប្រកាន់គោលនយោបាយចិនតែមួយ។
ជុំវិញរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជាហៅកាត់ថា ច្រាក់ (CHRAC) លោក រស់ សុដ្ឋា សង្កេតឃើញថា ការសម្រេចចិត្តរបស់កម្ពុជា ត្បិតតែឈរលើគោលជំហរនយោបាយចិនតែមួយក្តី ប៉ុន្តែលោកចង់ឃើញអាជ្ញាធរកម្ពុជា គួរគោរពសិទ្ធិសម្រេចចិត្តរបស់ជនសង្ស័យទាំងនោះ។ លោកបន្តថា ការបញ្ជូនពួកគេទៅចិនដីគោក នឹងធ្វើឱ្យប៉ះពាល់ដល់ការគោរពសិទ្ធិមនុស្ស។
យើងអាចបញ្ជូនទៅប្រទេសតៃវ៉ាន់វិញជាការគោរពសិទ្ធិមាតុភូមិកំណើត។ បញ្ហាហ្នឹង(ការបញ្ជូនជនជាតិតៃវ៉ាន់ទៅចិនដីគោក) ធ្វើឱ្យជំពាក់កាន់តែខ្លាំងណា ជំពាក់បញ្ហាសិទ្ធិមនុស្សផង និងបញ្ហាសុខទុក្ខជនជាតិត្រូវចោទផងណា។
— លោក រស់ សុដ្ឋា
ជនជាតិតៃវ៉ាន់ ចំនួន១៨០ នាក់ និងជនជាតិចិនដីគោកចំនួន ៧នាក់ត្រូវបានអាជ្ញាធរកម្ពុជា ចាប់ខ្លួន កាលពីថ្ងៃទី៣១ ខែមីនា ក្នុងប្រតិបត្តិការចូលឆ្មក់បង្ក្រាបទីតាំងឆបោកតាមអនឡាញមួយកន្លែង នៅក្នុងទីក្រុងភ្នំពេញ។
កម្ពុជាបានក្លាយជាទីតាំងប្រតិបត្តិការឆបោកតាមអនឡាញ ដែលពាក់ព័ន្ធនឹងការជួញដូរមនុស្ស និងការចាប់បង្ខាំងមនុស្ស។ ជនរងគ្រោះមួយចំនួនមកពីកោះតៃវ៉ាន់ មីយ៉ាន់ម៉ា និងប្រទេសនៅអាស៊ីមួយចំនួនទៀត។ ពួកគេត្រូវបានក្រុមឧក្រិដ្ឋជនបោកបញ្ឆោតតាមរយៈការផ្ដល់ការងារក្លែងក្លាយ ដើម្បីឱ្យមកធ្វើការងារឆបោកតាមអនឡាញនៅកម្ពុជា៕