អ្នកនាំពាក្យសមាគមការពារសិទ្ធិមនុស្សអាដហុក(Adhoc)លោក យិន ម៉េងលី បានប្រាប់វិទ្យុអាស៊ីសេរីនៅថ្ងៃទី១៦កក្កដាថា ការហូបចុកមិនគ្រប់គ្រាន់ ហើយគ្មានជីវជាតិ ភាពចង្អៀតណែន និងបរិស្ថានក្នុងពន្ធនាគារ ជាបញ្ហាចម្បងធ្វើឱ្យជនជាប់ឃុំស្គមស្គាំង។ លោកថា ករណីនេះបានប៉ះពាល់ដល់សុខភាពជនជាប់ឃុំនិងស្នើឱ្យរដ្ឋាភិបាលប្រញាប់ដោះស្រាយបញ្ហា។
អ៊ីចឹង គាត់បាត់បង់តែសិទ្ធិមនុស្សចំនួនទេ ប៉ុន្តែភាពជាមនុស្សរបស់គាត់នៅដដែល។ អ៊ីចឹងមនុស្សត្រូវអីខ្លះដើម្បីឱ្យបានរស់នៅភាពមួយសមរម្យ អ៊ីចឹងម្ហូបអាហារហូបចុកគ្រប់គ្រាន់មានជីវជាតិ កន្លែងស្នាក់នៅឱ្យបានស្អាតល្អសមរម្យ ការដេកសមរម្យឱ្យបានស្រួល ព្រោះគាត់ជាមនុស្ស។ នេះជាកាតព្វកិច្ចរបស់រដ្ឋាភិបាលត្រូវយកចិត្តទុកដាក់ ដែលទទួលខុសត្រូវ។
— លោក យិន ម៉េងលី
កាលពីថ្ងៃទី១៦ខែកក្កដាអ្នកប្រើប្រាស់បណ្ដាញសង្គមហ្វេសប៊ុកមួយចំនួនបានចែកចាយរូបថតអតីតសកម្មជនគណបក្សសង្គ្រោះជាតិ លោក ប៉ែន ច័ន្ទសង្គ្រាម ដែលទើបចេញពីពន្ធនាគារមានរាងកាយស្គមស្គាំងចេញឆ្អឹងជំនីខុសពីមុនពេលដែលគាត់ជាប់ពន្ធនាគារ។ អ្នកខ្លះបានបញ្ចេញមតិបង្ហាញការអាណិតអាសូរ លោក ប៉ែន ច័ន្ទសង្គ្រាម ដែលជាប់ឃុំដោយអយុត្តិធម៌។
ជុំវិញរឿងនេះ លោក ប៉ែន ច័ន្ទសង្គ្រាម បានបកស្រាយនៅក្នុងហ្វេសប៊ុកដោយសម្ដែងការមិនពេញចិត្តចំពោះការយករូបថតរបស់គាត់មកបង្ហោះក្នុងហ្វេសប៊ុកនោះទេ។
អ៊ីចឹង ហើយការយករូបភាពរបស់ខ្ញុំទៅបង្ហោះហើយបកស្រាយខុសពីការពិតដើម្បីចង់កេងចំណេញនយោបាយឬបម្រើមហិច្ឆតារបស់ខ្លួន។ដូច្នេះសុំបញ្ឈប់ជាបន្ទាន់ ហើយខ្ញុំនឹងធ្វើការបកស្រាយលំអិតរយៈពេល៣ថ្ងៃទៀត។
— លោក ប៉ែន ច័ន្ទសង្គ្រាម
ប្រធានពន្ធនាគារព្រៃស លោក នុត សាវនា បានប្រាប់វិទ្យុអាស៊ីសេរីដោយច្រានចោលការលើកឡើងនេះថា ជារឿងមិនពិត។ លោកបញ្ជាក់ថា មន្ត្រីពន្ធនាគារបានផ្ដល់អាហារហូបចុកមានជីវជាតិគ្រប់គ្រាន់ដល់ជនជាប់ឃុំ គឺមិនពុំមានការខ្វះខាតឡើយ។
គ្រាន់តែស្រែកថាខ្វះហ្នឹងរៀបចំឱ្យគាត់បន្ថែម យកបាយយកសម្លយកម្ហូបទៅបន្ថែម។អាគារណាបន្ទាប់ណាដែលខ្វះយើងអត់ដែលទុកគាត់ចោលទេឱ្យតែស្រែកមក។ អីចឹងកុំយកតែមួយករណីហ្នឹង ដែលមិនដឹងថាមូលហេតុអីបានស្គមស្គាំង ជួនកាលគាត់មានជំងឺរបេងឬជំងឺអីផ្សេងប្រចាំកាយ ពីមុនមកធ្លាប់ប្រើប្រាស់គ្រឿងញៀន។
— លោក នុត សវនា
ទោះជាយ៉ាងណាទីប្រឹក្សាគណបក្សកម្លាំងជាតិ ដែលមានបទពិសោធន៍ជាប់ពន្ធនាគារច្រើនលើក លោក រ៉ុង ឈុន បានមានប្រសាសន៍ថា អាហារហូបចុកនៅពន្ធនាគារ គ្មានជីវជាតិគ្រប់គ្រាន់និងគ្មានរស់ជាតិនោះទេ។ លោកថា ជនជាប់មួយចំនួនបានចំណាយប្រាក់ទិញអាហារពីខាងក្រៅមកហូបចុកដើម្បីរស់រាន។
យើងមើលរូបមួយស្លឹកនេះ អាណោចអាធ័មហើយរដ្ឋត្រូវតែធ្វើការកែលំអនៅក្នុងពន្ធនាគារធ្វើម៉េចឱ្យវាមានលក្ខណៈល្អប្រសើរ។ ហើយអ្នកសកម្មជននយោបាយនិងអ្នកនយោបាយហ្នឹង យើងឃើញថាដាក់ច្របូកច្របល់ជាមួយឧក្រិដ្ឋជនអ្នកជួញដូរចែកចាយប្រើប្រាស់ថ្នាំញៀនអី សព្វបែបយ៉ាងហ្នឹង។
— លោក រ៉ុង ឈុន
អង្គការសិទ្ធិមនុស្សជាតិ និងអន្តរជាតិតែងតែលើកឡើងពីក្ដីកង្វល់ពីភាពណែនតាន់តាប់ក្នុងពន្ធនាគារ និងបញ្ហាលំបាកផ្សេងៗ ហើយបានទាមទារឱ្យរដ្ឋាភិបាលដោះស្រាយបញ្ហានេះ ជាបន្តបន្ទាប់។
អតីតជនភៀសខ្លួនខ្មែរលោកប៉ែន ច័ន្ទសង្គ្រាម និង មនុស្ស៥នាក់ទៀតត្រូវបានអាជ្ញាធរថៃចាប់បញ្ជូនឱ្យអាជ្ញាធរកម្ពុជាកាលពីនៅថ្ងៃទី២៥ ខែវិច្ឆិកាឆ្នាំ២០២៤។
ពួកគាត់ត្រូវបានអាជ្ញាធរដោះលែងពីពន្ធនាគារកាលពីពេលថ្មីៗនេះ បន្ទាប់ពីជាប់ពន្ធនាគារព្រៃសអស់រយៈពេលជិត១ឆ្នាំ ពីបទ«រួមគំនិតក្បត់» ពាក់ព័ន្ធសកម្មភាពប្រឆាំងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម(CLV-DTA)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។