មន្ត្រីសង្គមស៊ីវិល បានលើកឡើងថា ការឃុំខ្លួន និងការចោទប្រកាន់លើលោក អ៊ុក ម៉ៅ នឹងធ្វើឱ្យប៉ះពាល់ដល់សេរីភាពបញ្ចេញមតិ និងជាការគំរាមកំហែងលើពលរដ្ឋ ឬសារព័ត៌មានផ្សេងទៀត ធ្វើឱ្យពួកគេលែងហ៊ានការពារព្រៃឈើ ។
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី បានឱ្យដឹងថា មន្ត្រីរបស់លោកបានទៅតាមដានដំណើររឿងនេះ នៅតុលាការខេត្តស្ទឹងត្រែង។ លោករិះគន់ថា ការយកបទចោទញុះញង់ និងបទបរិហារកេរ្តិ៍ មកចោទប្រកាន់លើលោក អ៊ុក ម៉ៅ ជាការដាក់បន្ទុកធ្ងន់ធ្ងរ។ លោកទទូចទៅតុលាការពិចារណា ទម្លាក់បទចោទទាំងនេះ និងដោះលែងលោក អ៊ុក ម៉ៅ ឱ្យមានសេរីភាពឡើងវិញ។
យើង (តុលាការ) យកបទញុះញង់មកអនុវត្តលើអ្នកសារព័ត៌មានចុះច្បាប់ស្ដីពីរបបសារព័ត៌មានដែលគេនិយាយឱ្យមានការកែតម្រូវតើសម្រាប់អនុវត្តទៅលើអ្នកណា? នេះជាបញ្ហាមួយ។ បញ្ហាមួយទៀត ពាក់ព័ន្ធនឹងសេរីភាពបញ្ចេញមតិអ៊ីចឹង អ្វីៗ ដែលគាត់បាននិយាយហ្នឹងគឺគាត់បានបង្ហាញភស្តុតាងអស់ហើយ ពីការបំផ្លាញព្រៃឈើ អ៊ីចឹងគប្បីតែធ្វើការសហការជាមួយគាត់ (លោក អ៊ុក ម៉ៅ)។
— លោក យិន ម៉េងលី
សមត្ថកិច្ចខេត្តស្ទឹងត្រែងបានចូលចាប់លោក អ៊ុក ម៉ៅ ដល់ក្នុងផ្ទះទាំងគ្មានសម្លៀកបំពាក់សមរម្យ និងមិនបានបង្ហាញដីកាហើយបញ្ជូនយកទៅឃុំខ្លួននៅពន្ធនាគារខេត្តស្ទឹងត្រែង កាលពីថ្ងៃទី១៦ ខែឧសភា។ ការចោទប្រកាន់ពីបទញុះញង់និងបទបរិហារកេរ្តិ៍នេះ ធ្វើឱ្យលោក អ៊ុក ម៉ៅ ប្រឈមជាប់ពន្ធនាគារពី៦ខែ ទៅ២ឆ្នាំ និងពិន័យជាប្រាក់មួយចំនួនទៀត។
ប្រធានសមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា (Camboja) លោក ណុប វី បានសង្កេតឃើញថា អ្វីដែលលោក អ៊ុក ម៉ៅ បានធ្វើកន្លងមកមិនមែនជាបទល្មើសដូចការចោទប្រកាន់ឡើយ។ លោកបន្តថា ចំណាត់ការរបស់តុលាការពេលនេះ ជាការគំរាមកំហែង និងជាការរារាំងលើការបំពេញការងាររបស់អ្នកសារព័ត៌មាន។
ខ្ញុំគិតថា អ្វីដែលជាការប្ដឹងការចោទប្រកាន់នេះ សម្រាប់ខ្ញុំអ្វីដែលលោក អ៊ុក ម៉ៅ បានធ្វើមិនមែនដើម្បីការពារផលប្រយោជន៍របស់គាត់ទេ គឺដើម្បីផលប្រយោជន៍រួមដើម្បីធនធានធម្មជាតិទេ ដូច្នេះការចោទប្រកាន់នេះ វាអយុត្តិធម៌សម្រាប់គាត់ណាស់។
— លោក ណុប វី
លោក អ៊ុក ម៉ៅ អាយុ៤៩ឆ្នាំ តែងតែចុះល្បាតព្រៃឈើ ផ្សព្វផ្សាយពីការបំផ្លាញព្រៃ និងលាតត្រដាងថា មន្ត្រីបរិស្ថានខេត្តស្ទឹងត្រែងយកលុយពីក្រុមឈ្មួញជួញដូរព្រៃឈើ។ លោក គឺជាសកម្មជនការពារព្រៃឈើ ជាអ្នកសារព័ត៍មាន “ឥន្ទ្រីផ្លាសញ៊ូ” និងក៏ជាមន្ត្រីគណបក្សក្រៅរដ្ឋាភិបាលមួយឈ្មោះថា ដើម្បីកម្ពុជា។
ប្រពន្ធលោក អ៊ុក ម៉ៅ លោកស្រី ឯក សុជាតិ ប្រាប់ថា លោកស្រីមិនទាន់បានជួបប្ដីនៅឡើយទេ តាំងពីថ្ងៃសមត្ថកិច្ចចាប់ខ្លួនប្ដីលោកស្រីកាលពីថ្ងៃទី១៦ ខែឧសភា។ លោកស្រីបានរិះគន់ថា ការចាប់ខ្លួន និងចោទប្រកាន់លើប្ដីលោកស្រីជាអំពើអយុត្តិធម៌។
រយៈពេលតាំងពីថ្ងៃ១៦ រហូតមកដល់ថ្ងៃនេះ (ថ្ងៃទី២០ ខែឧសភា) គឺអត់ទាន់បានជួបទេ លោកគ្រូ។ ថ្ងៃហ្នឹងខ្ញុំមកអង្គុយនៅមុខតុលាការតាំងពីម្សិលមិញរហូតដល់ថ្ងៃនេះ ក៏អត់បានជួបទៀត គេថា រយៈពេលពីកន្លះខែ ទៅមួយខែ។
— លោកស្រី ឯក សុជាតិ
លោកស្រី ឯក សុជាតិ នឹងត្រូវចិញ្ចឹមកូន៧នាក់តែម្នាក់ឯង នៅពេលប្ដីជាប់ពន្ធនាគារ។
ក្រៅពីបទចោទទាំងពីរនេះ តុលាការក៏បើកសវនាការលើសំណុំរឿងមួយទៀតគឺបទកាប់ទន្ទ្រានដីព្រៃ នៅថ្ងៃទី២៨ ខែឧសភា ខាងមុខនេះ។ លោក អ៊ុក ម៉ៅ ក៏កំពុងជាប់បណ្ដឹង ចំនួន១៥ករណីផ្សេងទៀតនៅតុលាការខេត្តស្ទឹងត្រែង ដោយដើមបណ្ដឹងជាមន្ត្រីបរិស្ថាន នៃមន្ទីរបរិស្ថានខេត្តស្ទឹងត្រែង និងអាជ្ញាធរពាក់ព័ន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។