សមត្ថកិច្ចថៃបានអះអាងថា ពួកគេបានស្រាវជ្រាវប្រមូលបានភស្តុតាងគ្រប់គ្រាន់អាចប្ដឹងចាប់លោក ហ៊ុន សែន បាន។
អ្នកនាំពាក្យមហាអយ្យការថៃ លោក សាក់ក្សេម នីសៃយោគ (Sakkasem Nisaiyok) បានប្រាប់ក្រុមអ្នកសារព័ត៌មានថៃនៅថ្ងៃទី១៤កក្កដាថា អង្គភាពជំនាញនៃមហាអយ្យការនឹងពិនិត្យមើលសំណុំរឿងនេះ ថាតើមានភស្តុតាងគ្រប់គ្រាន់ដើម្បីបញ្ជូនទៅតុលាការឬអត់។
លោកថា បើមានភស្តុតាងគ្រប់គ្រាន់ មហាអយ្យការនឹងបញ្ជូនសំណុំទៅតុលាការព្រហ្មទណ្ឌថៃ ហើយប្រសិនបើចុងចោទគឺ លោក ហ៊ុន សែន មិនបង្ហាញខ្លួន សមត្ថកិច្ចថៃនឹងបញ្ជូនដីកាចាប់ខ្លួនទៅប៉ូលិសអន្តរជាតិ (Interpol) ដើម្បីសុំកិច្ចសហការ។
អ្នកនាំពាក្យព្រឹទ្ធសភា លោក ជា ធីរិទ្ធ បានប្រាប់វិទ្យុអាស៊ីសេរីថា លោក ហ៊ុន សែន មិនមានការព្រួយបារម្ភពីនីតិវិធីរបស់សមត្ថកិច្ចថៃនេះទេ ។ លោកចាត់ទុកវិធានការរបស់សមត្ថកិច្ចថៃនេះ ថា ជាល្បិចស្មោកគ្រោក ដើម្បីសម្អុយឈ្មោះមេដឹកនាំកម្ពុជា។
ខ្ញុំមិនគិតរឿងទាំងនោះជាការពិតទេ ធម្មតាប្រទេសម្ខាង ប្រទេសដែលមានបញ្ហាឈ្លោះគ្នា ខាងនោះចង់និយាយស្អីក៏បានដែរហើយសំខាន់ ថាតើរឿងនោះវាយ៉ាងម៉េចដូចខ្ញុំបានបញ្ជាក់។ អ៊ីចឹង! ចំពោះករណីនេះជារឿងដែលឡប់ឡែសុទ្ធសាធហើយ ហើយវាអត់មានអីត្រូវមកមានបញ្ហាប្រទេសកម្ពុជាទេ។ ខ្ញុំគិតថា បើសិនជាតុលាការថៃប៉ូលិសចេញដីកាចាប់ខ្លួនកាន់តែឆាប់កាន់តែល្អ អញ្ជើញចាប់មក សូមអញ្ជើញបើតុលាការខ្លួនឯងធ្វើអ៊ីចឹង។
— លោក ជា ធីរិទ្ធ
កាលពីថ្ងៃទី១៨ខែមិថុនា លោក ហ៊ុន សែន បានបញ្ចេញសារសន្ទនារយៈពេលជាង១៧នាទី ដែលលោកបាននិយាយទូរស័ព្ទជាមួយអ្នកស្រី ផេថងថាន ស៊ីណាវ៉ាត់ តាមរយៈអ្នកបកប្រែពាក់ព័ន្ធបញ្ហាជម្លោះព្រំដែននៃប្រទេសទាំងពីរ។ សមត្ថកិច្ចថៃបានលើកឡើងថា រឿងនេះធ្វើឱ្យប៉ះពាល់ដល់សន្តិសុខជាតិថៃធ្ងន់ធ្ងរ ដែលធ្វើឱ្យកើតមានជម្លោះនៃក្រុមអ្នកនយោបាយថៃ ដែលនាំឱ្យបែកបាក់ជាតិ។
ប្រធានអង្គការប្រជាធិបតេយ្យខ្មែរនៅប្រទេសអូស្ត្រាលី (KDO) លោក ស៊ឹង សែនករុណា បានមានប្រសាសន៍ថា រឿងនេះជាជម្លោះនយោបាយរវាងមេដឹកនាំកម្ពុជានិងមេដឹកនាំថៃ ដើម្បីផ្ចាញ់ផ្ចាលគ្នាប៉ុណ្ណោះ ដូច្នេះតុលាការថៃមិនអាចយកមកចាត់ការផ្លូវច្បាប់លើ លោក ហ៊ុន សែន បានទេ។ លោកបញ្ជាក់ថា បើថៃចង់ចាត់វិធានការផ្លូវច្បាប់លើ លោក ហ៊ុន សែន លុះត្រាតែប្ដឹងករណីនេះទៅតុលាការយុត្តិធម៌អន្តរជាតិ។
អីចឹងយើងឃើញថាវាក្លាយជាបញ្ហាមួយ គឺមិនមែនជាវិវាទដោយមានលក្ខណៈមួយធ្វើឡើងក្នុងន័យរកដំណោះស្រាយបញ្ហាប្រទេសជាតិទេ រវាងប្រទេសមួយនឹងមួយទេ។ ទៅជាបញ្ហាវិវាទមេដឹកនាំនយោបាយបាយដែលជាបក្សពួកនីមួយៗ នឹងបង្កើតឡើង។ អីចឹងខ្ញុំគិតថាវាមិនអាចធ្វើទៅបានទេក្នុងកាលៈទេសៈពេលហ្នឹង។
— លោក ស៊ឹង សែនករុណា
កម្ពុជានិងថៃ មានជម្លោះព្រំដែនប្រទេសទាំងពីរ បន្ទាប់ពីទាហានកម្ពុជានិងថៃបានផ្ទុះអាវុធដាក់គ្នានៅតំបន់ព្រំដែនខេត្តព្រះវិហារកាលពីថ្ងៃទី២៨ឧសភា បណ្ដាលឱ្យទាហានខ្មែរម្នាក់ស្លាប់។ ប្រទេសទាំងពីរបានបញ្ជូនកងទ័ពនិងអាវុធធន់ធ្ងន់ ទៅប្រចាំការនៅតំបន់ព្រំដែន រហូតឈានដល់ការបិទច្រកព្រំដែន។
អ្នកឃ្លាំមើលលើកឡើងថា រឿងនេះជារូបភាពនៃជម្លោះការឆ្លើយឆ្លងគ្នារវាងមេដឹកនាំកម្ពុជានិងថៃដើម្បីយកឈ្មោះយកចាញ់គ្នាតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។