អ្នកច្បាប់និងជាអ្នកវិភាគឯករាជ្យ លោក វ៉ន ចាន់ឡូត បានប្រាប់វិទ្យុអាស៊ីសេរីថា រឿងនេះទំនងដោយសាររដ្ឋាភិបាលព្រួយបារម្ភខ្លាចក្រុមបក្សប្រឆាំងចូលរួមជាមួយថៃធ្វើសកម្មភាពនៅក្រៅប្រទេសប្រឆាំងនឹងរដ្ឋាភិបាល ហើយធ្វើឱ្យរង្គោះរង្គើដល់អំណាចដឹកនាំគ្រួសារត្រកូលហ៊ុន។ ទោះជាយ៉ាងណាលោកថា បើជ្រុលធ្វើវិសោធនកម្មច្បាប់នេះហើយ រដ្ឋសភាគួរតែពិនិត្យបន្ថែមទោសទណ្ឌដល់ជនទាំងឡាយណាដែលលួចគប់គិតផ្ដល់សញ្ជាតិឱ្យជនបរទេសដែរ។
គួរតែទទួលទោសធ្ងន់ធ្ងរដូចដែលទោសនៃជនក្បត់ជាតិឬក៏ជនទាំងឡាយណាដែលធ្វើឱ្យប៉ះពាល់ទៅដល់ឧត្ដមប្រយោជន៍របស់ជាតិខ្មែរខ្ញុំគិតថា វាអាចនឹងជួយបន្ថែមទៅដល់ប្រសិទ្ធភាពនៃការការពារនូវផលប្រយោជន៍ឬក៏ឧត្ដមប្រយោជន៍របស់ជាតិខ្មែរ។
— លោក វ៉ន ចាន់ឡូត
ការលើកឡើងនេះធ្វើឡើងបន្ទាប់ពីរដ្ឋសភាជាតិនៅព្រឹកថ្ងៃទី១១ខែកក្កដាបានលើកដៃអនុម័តនៅក្នុងអង្គប្រជុំជាឯកច្ឆន្ទដោយគ្មានការជំទាស់លើវិសោធនកម្មរដ្ឋធម្មនុញ្ញមាត្រា៣៣ដកហូតសញ្ជាតិពលរដ្ឋខ្មែរ ដោយសំឡេង ១២៥លើ១២៥នៃអង្គសភាទាំងមូល។
មាត្រា៤៩ថ្មីនៃរដ្ឋធម្មនុញ្ញ ចែងថា ពលរដ្ឋខ្មែរគ្រប់រូប ត្រូវតម្កល់ផលប្រយោជន៍ជាតិជាធំ ហើយមិនត្រូវធ្វើសកម្មភាពណាមួយ ទោះដោយផ្ទាល់ឬប្រយោលក្ដី នាំឱ្យប៉ះពាល់ដល់ផលប្រយោជន៍កម្ពុជានិងពលរដ្ឋខ្មែរឡើយ។ ភ្លាមៗក្រោយពេលអនុម័តរដ្ឋសភាបានបញ្ជូនច្បាប់ថ្មីនេះទៅដល់ព្រឹទ្ធសភាហើយនៅថ្ងៃដដែលនេះ ដើម្បីពិនិត្យនិងសម្រេចបន្ត។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានអះអាងនៅក្នុងសន្និសីទកាសែតថា គោលបំណងនៃការកែច្បាប់ថ្មីនេះ គឺដើម្បីបន្សុទ្ធទឹកចិត្តពលរដ្ឋខ្មែរចំពោះជាតិមាតុភូមិនិងពលរដ្ឋកម្ពុជា ពោលគឺដើម្បីលើកកម្ពស់មនសិការស្នេហាជាតិនិងគោលជំហរស្មោះត្រង់ឥតងាករេ។ លោកបញ្ជាក់ថា ច្បាប់នេះគឺដកសញ្ជាតិចំពោះតែជនណាដែលបានក្បត់ជាតិខ្លួនឯងប៉ុណ្ណោះ។
ប្រជាពលរដ្ឋដែលស្រលាញ់ជាតិមានស្មារតីឥតងាករេចំពោះជាតិមិនមែនជាកម្មវត្ថុនៃការដកសញ្ជាតិទេ។ ហើយម្យ៉ាងទៀតច្បាប់ដើម្បីការពារប្រជាពលរដ្ឋដែលស្រលាញ់ជាតិដែលស្មោះនឹងជាតិគឺត្រូវមានច្បាប់មួយការពារ។មុននេះក្នុងរដ្ឋសភាបានលើកឡើងចំណុចនេះដែរ បើអ្នកក្បត់ជាតិហើយគឺជាតិមិនទុកអ្នកទេ។
— លោក កើត រិទ្ធ
ទោះជាយ៉ាងណា អនុប្រធានគណបក្សសង្គ្រោះជាតិ លោក អេង ឆៃអ៊ាង មិនភ្ញាក់ផ្អើលនឹងការធ្វើការធ្វើវិសោធនកម្មច្បាប់ថ្មីនេះទេ ព្រោះលោកថា ច្បាប់នេះមិនបម្រើប្រយោជន៍ដល់ពលរដ្ឋខ្មែរឡើយ ផ្ទុយទៅវិញ គឺជាឧបករណ៍នយោបាយរបស់លោក ហ៊ុន សែន តែប៉ុណ្ណោះ។
ព្រោះយើងដឹងហើយថាតាំងពី លោក ហ៊ុន បានអំណាចពេញដៃតែម្នាក់ឯងតាំងពីរម្លាយគណបក្សសង្គ្រោះជាតិឆ្នាំ២០១៧មក លោក ហ៊ុន សែន គាត់បានបង្កើតប្រវត្តិសាស្ត្រក្លែងក្លាយគ្រប់បែបយ៉ាង។ ហើយដើម្បីបំភ័យឱ្យគេជឿគាត់ត្រូវបិទមាត់គេ ដេរមាត់គេ ដូច្នេះប្រជាពលរដ្ឋខ្មែរនៅក្នុងប្រទេសគាត់បិទមាត់បានមិនឱ្យនិយាយ។ អីចឹងគាត់ត្រូវការបិទអ្នកស្នេហាជាតិនៅក្រៅប្រទេសទៀត ដើម្បីពង្រឹងអំណាចគាត់តត្រកូលរបស់គាត់ ដូចករណីធ្វើច្បាប់ដកសញ្ជាតិអីចឹង។គោលដៅរបស់គាត់គឺគាត់មិនចង់ឱ្យអ្នកស្នេហាជាតិលាតត្រដាងនូវទង្វើអាក្រក់របស់គាត់។
— លោក អេង ឆៃអ៊ាង
កាលពីថ្ងៃទី២៧ខែមិថុនា ប្រធានព្រឹទ្ធសភា លោក ហ៊ុន សែន បានស្នើឱ្យរដ្ឋមន្ត្រីក្រសួងយុត្តិធម៌ ធ្វើវិសោធនកម្មរដ្ឋធម្មនុញ្ញដកហូតសញ្ជាតិពីប្រជាពលរដ្ឋខ្មែរទាំងឡាយណាដែលលោកចាត់ទុកថា បានប្រព្រឹត្តអំពើក្បត់ជាតិ។
ប៉ុន្តែអ្នកឃ្លាំមើលបញ្ហាសង្គមនិងអ្នកប្រើប្រាស់បណ្ដាញសង្គមហ្វេសប៊ុកមួយចំនួនបានរិះគន់ថា ការកែច្បាប់នេះគឺជាលេសក្នុងការធ្វើទុក្ខបុកម្នេញក្រុមបក្សប្រឆាំងដើម្បីរក្សាអំណាចគ្រួសារត្រកូលហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។