សារព័ត៌មានជប៉ុនក្យូដូ (Kyodo) បានដកស្រង់សំដីរបស់រដ្ឋមន្ត្រីក្រសួងការពារជាតិជប៉ុនលោក ជេន ណាកាតានី (Gen Nakatani) ឱ្យដឹងថា ការចូលចតរបស់នាវាជប៉ុននៅមូលដ្ឋានទ័ពជើងទឹករាម នឹងជួយឱ្យប្រទេសកម្ពុជា មានកំពង់ផែកងទ័ពជើងទឹកមួយដែលបើកទូលាយ និងមានតម្លាភាព។ ប្រភពដដែលបន្តថា រដ្ឋមន្ត្រីក្រសួងការពារជាតិជប៉ុន ក៏លើកឡើងពីការព្រួយបារម្ភរបស់ជប៉ុន ជុំវិញការពង្រីកសកម្មភាពយោធារបស់ចិននៅក្រៅប្រទេស។
វិទ្យុអាស៊ីសេរីមិនអាចសុំការអត្ថាធិប្បាយបន្ថែម ពីអ្នកនាំពាក្យក្រសួងការពារជាតិ លោក ឈុំ សុជាតិ បានទេនៅថ្ងៃទី១៥ ខែមេសា។ អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា ការចូលចតរបស់នាវាជប៉ុន ជាការរឹតចំណងមិត្តភាពនៃយោធាប្រទេសទាំងពីរ និងមិនពាក់ព័ន្ធនឹងវត្តមានលោក ស៊ី ជីនពីង ឡើយ។
លោក សុខ ឥសាន៖ «ដើម្បីជម្រះមន្ទិលសង្ស័យ កុំឱ្យចេះតែចោទប្រកាន់ពីមុនមកថា មានតែកប៉ាល់នាវាចម្បាំងរបស់ចិនទេដែលចតបាន ក្រៅពីនេះ គេមិនឱ្យចូលចត។ ការចូលចតនាវាចម្បាំងដ៏ដោយកប៉ាល់ជំនួញក៏ដោយមកកម្ពុជា គឺកម្ពុជាស្វាគមន៍គ្រប់ពេលអត់មានកំណត់ពេលណាជាពេលណាទេបាទ»។
កំពង់ផែយោធារាម ដែលជាជំនួយរបស់ចិនទើបសាងសង់បន្ថែមរួចរាល់ ត្រូវបានសម្ពោធដាក់ឱ្យប្រើប្រាស់កាលពីថ្ងៃទី០៥ ខែមេសា។ នាវាយោធារបស់ជប៉ុនគឺជានាវាយោធាបរទេសទីមួយ ដែលនឹងចូលចតមុនគេនៅកំពង់ផែរាម។
អ្នកសិក្សាកិច្ចការសង្គម និងនយោបាយ លោក ប៉ោ មករា យល់ឃើញថា កម្ពុជាកំពុងព្យាយាមរក្សាតុល្យភាព ឬរក្សាទំនាក់ទំនងល្អជាមួយប្រទេសកុម្មុយនិស្ត និងប្រទេសសេរី។ លោកបន្តថា ដើម្បីអាចលាងភាពមន្ទិលសង្ស័យថាគ្មានយោធាចិននៅមូលដ្ឋានទ័ពជើងទឹករាម កម្ពុជាគួរអនុញ្ញាតឱ្យនាវាយោធាប្រទេសលោកសេរីផ្សេងចូលចត និងធ្វើសមយុទ្ធយោធារួមគ្នា។
ជាសញ្ញាល្អមួយសម្រាប់កម្ពុជា ប៉ុន្តែសុំឱ្យចេញពីជប៉ុនទៅមានប្រទេសផ្សេងៗ ពាក់ព័ន្ធសេរីក្នុងការចូលចត ក្នុងការធ្វើទំនាក់ទំនងជាមួយគ្នា ដូចជប៉ុនជាដើម។ ខ្ញុំគិតថា ជាការបង្ហាញទៅដល់ពិភពលោក ក៏ដូចជានៅក្នុងតំបន់ពាក់ព័ន្ធនឹងការសង្ស័យរបស់សហរដ្ឋអាមេរិក។ អ៊ីចឹងសហរដ្ឋអាមេរិក នឹងអាចកាត់បន្ថយការសម្លឹងមកមើលកម្ពុជា ក្នុងផ្លូវអាក្រក់តទៅទៀតណា។
— លោក ប៉ោ មករា
កាលពីថ្ងៃទី៥ ខែមេសា លោកនាយករដ្ឋមន្ត្រី ហ៊ុន ម៉ាណែត អះអាងដែរថា កម្ពុជា ត្រៀមស្វាគមន៍នាវាយោធាបរទេសមកទស្សនកិច្ចនៅមូលដ្ឋានទ័ពជើងទឹករាម និងអះអាងជាថ្មីទៀតថា គ្មានមូលដ្ឋានយោធាបរទេសនៅកម្ពុជាឡើយ។ ទោះយ៉ាងណាក្រុមប្រទេសសេរីហាក់មិនទាន់ជឿជាក់លើការអះអាងនេះទេ។ សហរដ្ឋអាមេរិកបានបង្ហាញជំហរ ចង់ចូលទៅទស្សនកិច្ចនៅមូលដ្ឋាននេះ នៅពេលខាងមុខ ដើម្បីកំណត់ឱ្យកាន់តែច្បាស់ពីសកម្មភាពរបស់ចិននៅមូលដ្ឋានទ័ពជើងទឹករាម៕
ណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។