ប្រជាពលរដ្ឋនៅខេត្តមណ្ឌលគិរីលើកឡើងថា ព្រៃឈើស្ថិតក្នុងគ ម្រោងរ៉េដបូក (REDD+) នៃដែនជម្រកសត្វព្រៃកែវសីមា នៅតែបន្តរងលួចកាប់ឈើមានតម្លៃធ្វើអាជីវកម្មយកទៅលក់នៅប្រទេសវៀតណាម និងក្នុងស្រុក ដោយមិនឃើញមានមន្ត្រីជំនាញនៅតំបន់នោះមានវិធានការទប់ស្កាត់ឡើយ។ មន្ត្រីសង្គមស៊ីវិលទទូចឲ្យរដ្ឋាភិបាលត្រួតពិនិត្យទៅលើមន្ត្រីថ្នាក់ក្រោម និងត្រូវអនុវត្តច្បាប់ឱ្យបានតឹងរ៉ឹងករណីពួកគេមិនអនុវត្តការងារ ឬគប់គិតជាមួយជនល្មើសបំផ្លាញព្រៃឈើ។
ព្រៃឈើនៅដែនជម្រកសត្វព្រៃកែវសីមា ដែលជាគម្រោងរ៉េដបូក ស្ថិតក្រោមការគ្រប់គ្រងក្រសួងបរិស្ថាន ហើយកំពុងដាក់លក់ឥណទានកាបូន ក្នុងខេត្តមណ្ឌលគីរី នៅតែមានក្រុមឈ្មួញលួចកាប់ និងដឹកជញ្ជូនឈើ យកទៅលក់នៅប្រទេសវៀតណាម និងក្នុងស្រុកជារៀងរាល់ថ្ងៃ។
«ឈ្មួញបន្តកាប់ឈើធ្វើអាជីវកម្មក្នុងដែនជម្រកសត្វព្រៃកែវសីមា»
ប្រធានសហគមន៍តំបន់ការពារធនធានធម្មជាតិឃុំស្រែព្រះ លោក នៀវ កាណុង ប្រាប់វិទ្យុអាស៊ីសេរី នៅថ្ងៃទី២៥ ខែកុម្ភៈ ថា ក្រុមឈ្មួញនៅតែបន្តកាប់ឈើធ្វើអាជីវកម្មក្នុងដែនជម្រកសត្វព្រៃកែវសីមា យកទៅលក់នៅប្រទេសវៀតណាម និងនៅក្នុងស្រុក ជារៀងរាល់ថ្ងៃ។ លោកបន្ថែមថា ការដែលមានការកាប់ឈើធ្វើអាជីវកម្មនៅក្នុងតំបន់អភិរក្សរបស់ក្រសួងបរិស្ថានបាន ដោយសារតែមន្ត្រីនៅតំបន់នោះ គប់គិតគ្នាជាប្រព័ន្ធ ជាមួយក្រុមឈ្មួញ ទើបមិនមានការអនុវត្តច្បាប់ និងគ្មានវិធានការតឹងរ៉ឹង។
លោក នៀវ កាណុង៖«មិនថានៅក្នុងដែនជម្រកសត្វព្រៃ និងតំបន់ការពារធម្មជាតិរបស់សហគមន៍ទេ គេកាប់ឈើទូទៅ មួយចំនួនគេយកទៅប្រើខ្លួនឯង ហើយមួយចំនួនទៀតគេយកទៅលក់នៅវៀតណាម ខ្ញុំចង់ឲ្យអាជ្ញាធរដែនដី គាត់អនុវត្តច្បាប់ បើថាចាប់អ្នកកាប់ក្នុងព្រៃច្រកព្រំដែនមិនព្រមបិទនៅកាប់ឈើដដែល ទាល់តែយើងបិទច្រកព្រំដែនលែងមាននរណាហ៊ានកាប់ឈើហើយ»។
សហគមន៍ស្នើឲ្យអាជ្ញាធរពាក់ព័ន្ធបិទច្រកព្រំដែនរវាងកម្ពុជា-វៀតណាម ដែលក្រុមឈ្មួញតែងតែដឹកជញ្ជូនឈើ យកទៅលក់នៅប្រទេសវៀតណាម និងត្រូវអនុញ្ញាតឲ្យសហគមន៍ អង្គការដៃគូចូលរួមទប់ស្កាត់ ទើបអាចទប់ស្កាត់ការកាប់ឈើធ្វើអាជីវកម្មនេះមានប្រសិទ្ធភាព។
ជុំវិញរឿងនេះ វិទ្យុអាស៊ីសេរី មិនអាចសុំការបកស្រាយពីប្រធានមន្ទីរបរិស្ថានខេត្តមណ្ឌលគិរី លោក ហាប់ វិបុល និងអ្នកនាំពាក្យក្រសួងបរិស្ថាន លោក ខ្វៃ អាទិត្យា បានទេនៅថ្ងៃទី២៥ ខែកុម្ភៈ។
ដែនជម្រកសត្វព្រៃកែវសីមា បច្ចុប្បន្នត្រូវបានក្រសួងបរិស្ថានដាក់លក់ឥណទានកាបូន ឬហៅថាគម្រោងរ៉េដបូក លើផ្ទៃដីជិត២សែនហិកតារ។ បើតាមការចុះផ្សាយរបស់កាសែតក្នុងស្រុកស្និទ្ធជាមួយរដ្ឋាភិបាល លើកឡើងថា ក្រសួងបរិស្ថានបានប្រមូលថវិកាពីការលក់ឥណទានកាបូនរាប់សិនលានដុល្លារ និងបានកៀរគររកថវិកាពីម្ចាស់ជំនួយអន្តរជាតិជិត១០ស្ថាប័ន ដើម្បីយកលុយទាំងនោះទៅការពារតំបន់អភិរក្សមួយនេះ។ ប៉ុន្តែមួយរយៈចុងក្រោយនេះ ដែនជម្រកសត្វព្រៃកែវសីមា រងការកាប់ឈើធ្វើអាជីវកម្មឆ្លងដែន និងកាប់ទន្ទ្រានដីព្រៃពីសំណាក់ក្រុមឈ្មួញយ៉ាងអនាធិបតេយ្យ។
អត្ថបទដែលទាក់ទង៖
មន្ត្រីសង្គមស៊ីវិលស្នើឱ្យរដ្ឋាភិបាលពិនិត្យមន្ត្រីថ្នាក់ក្រោម
ទាក់ទងនឹងបញ្ហានេះ មន្ត្រីសម្របសម្រួលសមាគមអាដហុក (Adhoc) ប្រចាំខេត្តមណ្ឌលគីរី លោក ប៊ី វ៉ាន់នី យល់ឃើញថា រដ្ឋាភិបាលត្រូវតែចុះត្រួតពិនិត្យទៅលើមន្ត្រីថ្នាក់ក្រោម ដែលបណ្ដែតបណ្ដោយឲ្យមានការកាប់ឈើធ្វើអាជីវកម្ម និងកាប់ទន្ទ្រានដីព្រៃដោយខុសច្បាប់ឲ្យបានហ្មត់ចត់ និងត្រូវដាក់ទោសទណ្ឌលើមន្ត្រីរូបណាដែលជាប់ពាក់ព័ន្ធបទល្មើសព្រៃឈើ បើមិនដូច្នោះទេ ការទប់ស្កាត់បទល្មើសព្រៃឈើមិនមានប្រសិទ្ធភាពឡើយ។
លោក ប៊ី វ៉ាន់នី៖«វិធានការរបស់យើងអនុវត្តតែអ្នកប្រព្រឹត្តផ្ទាល់ ហើយអ្នកដែលឈរចាំទិញឈើដែលខុសច្បាប់នាំចេញទៅលក់នៅក្រៅប្រទេស យើងអត់ទាន់ស្រាវជ្រាវដល់កម្រិតនឹង មន្ត្រីកងរាជអាវុធហត្ថនៅតាមផ្លូវក៏យើងមាន ទីស្នាក់ការបរិស្ថាន និងរដ្ឋបាលព្រៃឈើក៏យើងមាន ថាហេតុអ្វីបានជាគេដឹកឈើយកទៅលក់នៅព្រំដែនបាន?ចំណុចនេះរដ្ឋាភិបាលគួរតែសិក្សាឡើងវិញហើយយើងរកឲ្យឃើញនូវបញ្ហាទាំងអស់នេះ»។
កាលពីចុងឆ្នាំ២០២៣ រដ្ឋាភិបាលបានប្រកាសពីការពង្រីកទំហំផ្ទៃដីដែនជម្រកសត្វព្រៃកែវសីមា ពីជាង ២៩ម៉ឺនហិកតារ (២៩២.៦៩០) ទៅជាង៣១ម៉ឺនហិកតារ (៣១៧.៤៥៦)។ បើទោះបីរដ្ឋាភិបាលពង្រីកផ្ទៃដីយ៉ាងណាក្ដី ក៏តំបន់ការពារមួយនេះ នៅតែរងការកាប់យកឈើមានតម្លៃ និងកាប់ទន្ទ្រានដីព្រៃពីសំណាក់ក្រុមឈ្មួញយ៉ាងអនាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។