ពលរដ្ឋថា ការលើកឡើងរបស់អ្នកនាំពាក្យរដ្ឋាភិបាលថា អាជ្ញាធរបានជោគជ័យលើការបង្ក្រាបការទន្ទ្រានដីព្រៃខុសច្បាប់មិនឆ្លុះបញ្ចាំងពីការពិតទាំងស្រុងនោះទេ។ គ្រួសារពលរដ្ឋរងគ្រោះដោយការចោទប្រកាន់ថា បានរុករានដីព្រៃខុសច្បាប់ ហើយត្រូវបានអាជ្ញាធរចាប់ដាក់ពន្ធនាគារ អះអាងថា ការចោទប្រកាន់មួយចំនួនរបស់អាជ្ញាធរមកលើពលរដ្ឋ ធ្វើឡើងដោយគ្មានតម្លាភាព ហើយបង្កការឈឺចាប់ដល់ពលរដ្ឋ។
ការលើកឡើងរបស់ពលរដ្ឋ គឺជាការឆ្លើយតបនឹងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ថ្លែងនៅវេទិកាសារព័ត៌មានលើកទី៦ ស្ដីពី «រាជរដ្ឋាភិបាលនីតិកាលទី៧ នៃរដ្ឋសភា ជាក្ដីសង្ឃឹមរបស់ពលរដ្ឋខ្មែរ» នៅថ្ងៃទី២៧ ខែកុម្ភៈថា ក្រោមការដឹកនាំរបស់នាយករដ្ឋមន្ត្រី លោក ហ៊ុន ម៉ាណែត បានបង្ក្រាបជោគជ័យលើពលរដ្ឋ ដែលទន្ទ្រានដីព្រៃខុសច្បាប់។
លោក ប៉ែន បូណា លើកឡើងថា ចាប់តាំងពីខែមិថុនា ឆ្នាំ២០២៤ ដល់ពាក់កណ្ដាលខែកុម្ភៈ ឆ្នាំ២០២៥ នេះ អាជ្ញាធរបានរំដោះដីព្រៃពីការកាប់ទន្ទ្រានខុសច្បាប់បានចំនួនជាង ៤ម៉ឺនហិកតារ ព្រមទាំងដកហូតសម្ភារៈ និងចាប់ខ្លួនពលរដ្ឋជាច្រើននាក់ផងដែរ។
លោក ប៉ែន បូណា៖«ការទន្ទ្រានដីព្រៃខុសច្បាប់ ដែលសម្ដេចធិបតីចេញបទបញ្ជាម៉ឺងម៉ាត់ឱ្យអាជ្ញាធរពាក់ព័ន្ធចាត់វិធានការ ហើយក្នុងហ្នឹងក៏មានកងយោធពលខេមរភូមិន្ទយើងផងដែរ ដែលត្រូវចូលរួមចំណែកប្រតិបត្តិការហ្នឹង»។
ទោះជាយ៉ាងណាក្ដី កូនស្រី លោកស្រី សេន ពិសី ដែលត្រូវបានចាប់ខ្លួនពាក់ព័ន្ធនឹងការទន្ទ្រានដីព្រៃ ថ្លែងក្នុងលក្ខខណ្ឌសុំមិនបញ្ចេញឈ្មោះ ព្រោះបារម្ភអំពីសុវត្ថិភាពថា ម្ដាយរបស់កញ្ញាបានជាប់ពន្ធនាគារទាំងអយុត្តិធម៌ ក្រោមបទចោទថា កាប់ រុករាន និងឈូសឆាយដីព្រៃ ក្នុងតំបន់ការពារធម្មជាតិ នៅភ្នំ១៥០០ ខេត្តពោធិ៍សាត់ តាមបណ្ដឹងរបស់អាជ្ញាធរអស់រយៈពេលជាង ៣ខែមកហើយ។ កញ្ញាថា ការចោទប្រកាន់របស់អាជ្ញាធរមកលើម្ដាយលោកស្រីនេះ គឺជារឿងមិនត្រឹមត្រូវនោះទេ ព្រោះថា ដីដែលម្ដាយកញ្ញាបានទិញដីពីទាហាននៅតំបន់នោះ ហើយអាជ្ញាធរមូលដ្ឋាន ក៏បានចេញលិខិតទទួលស្គាល់ដែរ គឺមិនមែនរុករានដីខុសច្បាប់ដូចការចោទប្រកាន់របស់អាជ្ញាធរនោះឡើយ។
កូនស្រី លោកស្រី សេន ពិសី លើកឡើងថា តុលាការគួរតែពិចារណាលើអង្គហេតុជាក់ស្ដែង និងដោះលែងម្ដាយកញ្ញាឱ្យមានសេរីភាពឡើងវិញ ខណៈដែលពេលនេះគ្រួសាររបស់កញ្ញាកំពុងជួបការលំបាកកាន់តែខ្លាំង។
កូនស្រីលោកស្រី សេន ពិសី៖«អ្វីដែលខ្ញុំសំណូមពរ គឺខ្ញុំមានតែសុំសំណូមឱ្យគាត់ជួយដោះលែងម្ដាយខ្ញុំ ហើយចង់ឱ្យគាត់ពិនិត្យមើលភស្តុតាង ឬក៏ពិនិត្យមើលទីតាំងឱ្យបានជាក់ស្ដែងឱ្យបានច្បាស់លាស់សិនមុននឹងយកមនុស្សទៅដាក់ពន្ធនាគារ»។
ពាក់ព័ន្ធនឹងករណីនេះដែរ មន្ត្រីសមាគមការពារសិទ្ធិមនុស្សអាដហុក បានចុះធ្វើការស្រាវជ្រាវ និងជួបជាមួយមន្ត្រីខេត្តពោធិ៍សាត់ កាលពីថ្ងៃទី២៥ ខែកុម្ភៈ ក្រោយពីរកឃើញថា ករណីចោទប្រជាពលរដ្ឋថា ទៅកាប់គាស់រុករានដី ដើម្បីយកទៅធ្វើជាកម្មសិទ្ធិដោយគ្មានការអនុញ្ញាតនៅតំបន់ភ្នំ១៥០០ ខេត្តពោធិ៍សាត់ គឺជារឿងមិនត្រឹមត្រូវ។ មន្ត្រីសមាគមអាដហុកអះអាងថា ប្រជាពលរដ្ឋនៅតំបន់នោះបានទិញដីពីទាហាន ខណៈដែលទាហានខ្លះបានសាងសង់លំនៅឋានធំៗ ឬរីសតដែរ។ បន្ថែមពីនេះ អាជ្ញាធរនៅមិនទាន់កំណត់ទីតាំងដីរដ្ឋ និងដីពលរដ្ឋឱ្យបានច្បាស់លាស់នៅឡើយទេ។
អត្ថបទដែលទាក់ទង៖
សហគមន៍ព្រៃឡង់ស្នើអាជ្ញាធរឱ្យបង្ហាញព័ត៌មានជាក់លាក់អំពីការកាត់ដីព្រៃក្នុងតំបន់ការពារឱ្យឯកជន
សហគមន៍ព្រៃឡង់ បន្តរកឃើញបទល្មើសព្រៃឈើ និងការកាប់ទន្ទ្រានដីព្រៃក្នុងដែនជម្រកសត្វ ព្រៃឡង់
អ្នកនាំពាក្យសមាគមការពារសិទ្ធិមនុស្សអាដហុក លោក យិន ម៉េងលី លើកឡើងបន្ថែមថា ការចាត់វិធានការច្បាប់របស់រដ្ឋាភិបាលក្នុងការពារតំបន់ការពារព្រៃឈើ គឺជារឿងល្អ ប៉ុន្តែលោកថារដ្ឋាភិបាលគួរតែអនុវត្តច្បាប់ឱ្យមានភាពស្មើគ្នា។ លោក យិន ម៉េងលី ថា មន្ត្រី និងអ្នកមានលុយមានអំណាចមួយចំនួនគឺជាមេខ្លោងជួលពលរដ្ឋក្រីក្រឱ្យទៅកាប់ទន្ទ្រានដីព្រៃ ខណៈដែលមន្ត្រីមួយចំនួនទៀត គឺជាអ្នកលក់ដីរដ្ឋឱ្យពលរដ្ឋ។
លោក យិន ម៉េងលី៖«ប្រជាពលរដ្ឋខ្លះគាត់អត់មានមុខរបរ គាត់ក្រ អ៊ីចឹងគាត់ទៅស៊ីឈ្នួលគេ បើកគ្រឿងចក្រឱ្យគេ ទៅធ្វើអ្វីៗ កាប់ឆ្ការ ប៉ះពាល់ដល់ព្រៃ ដល់ដីរបស់រដ្ឋ ដើម្បីជីវភាព ដើម្បីក្រពះ ដល់ពេលអ៊ីចឹងពេលខ្លះពួកគាត់ត្រូវប្រឈមក្នុងការបង្ក្រាបរបស់រដ្ឋាភិបាល ចាត់វិធានការ អ៊ីចឹងអ្នកនៅពីក្រោយខ្នងក៏ពាក់ព័ន្ធដែរនៅក្នុងអំពើហ្នឹង ពេលខ្លះគេឱ្យប្រជាពលរដ្ឋទៅធ្វើទៅគេអត់ចេញមុខ រួចអស់លោកហ្នឹងនៅពីក្រោយទៅវិញ»។
កូនស្រីលោកស្រី សេន ពិសី និយាយថា ក្រោយពីអាជ្ញាធរចាប់ម្ដាយកញ្ញាដាក់ពន្ធនាគារមក ប្អូនៗកញ្ញាបានបាក់ទឹកចិត្តក្នុងការរៀនសូត្រព្រោះពួកគាត់ជឿជាក់ម្ដាយកញ្ញាមិនបានប្រព្រឹត្តខុសដូចការចោទប្រកាន់របស់អាជ្ញាធរនោះឡើយ ហើយបច្ចុប្បន្ននេះម្ដាយកញ្ញាកំពុងធ្លាក់ខ្លួនឈឺក្នុងពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។